Tbilisi Fashion Week F/W 2018

თბილისის მოდის კვირეული იწყება.  

2018 წლის შემოდგომა-ზამთრის სეზონის კოლექციების ჩვენებებს, შოურუმს და სხვა ღონისძიებებს თბილისის ბალნეოლოგიური კურორტი უმასპინძლებს. კვირეული თბილისის მერიის, საქართველოს კულტურისა და სპორტის სამინისტროს, ეკონომიკისა და მდგრადი განვითარების სამინისტროს, სააგენტოს „აწარმოე საქართველოში“ და ტურიზმის ეროვნული ადმინისტაციის მხარდაჭერით ხორციელდება Check in Georgia-ს ფარგლებში.

მოდის კვირეულის საიმიჯო ფოტო პირდაპირ უკავშირდება ლოკაციას, სადაც კვირეული გაიმართება - თბილისის ბალნეოლოგიური კურორტი. იარლიყი პოსტ-საბჭოთა ქვეყანა სწორედ ის არის, რასაც უცხოური პრესა პირველ რიგში მოიხსენიებს ქართული მოდის ხსენებისას, ლოკაციაც სწორედ ამ მიზნით შეირჩა. ბალნეოლოგიური კურორტი ერთ-ერთი იმ ადგილთაგანია, სადაც  POST-SOVIET ვაიბი ნამდვილად იგრძნობა.

კვირეულმა დაამკვიდრა ტრადიცია და გახსნის დღეს ქართული კულტურისა და ხელოვნების ლეგენდებს უთმობს. 19 აპრილს, SOLO წარმოადგენს პროექტს „მედეა ჯაფარიძე – Style Icon”, რომელიც თბილისის მოსწავლე-ახალგაზრდობის ეროვნული სასახლის ბაღში ჩატარდება. წვეულებაზე გაცოცხლდება კადრები ფილმიდან „ქეთო და კოტე“, პერფორმანსის და გამოფენის სახით ვიხილავთ „ქეთოს სამოსს“, ყარაჩოღელებსა და სხვა ამონარიდებს კლასიკად ქცეული ქართული ფილმიდან. 

კვირეულის 4 დღიანი პროგრამა მოიცავს 20-მდე ღონისძიებას, რომელთა შორისაა ქართველი და უცხოელი დიზაინერების ჩვენებები: ქეთი ჩხიკვაძე, ანი დათუკიშვილი, Tsite by Tamara Tsiteladze, ლაშა ჯოხაძე, ELENNY, MIA, SAYYA, MIRO, Mak Mari. ლონდონის და მილანის მოდის კვირეულების შემდეგ, თბილისელი მაყურებლის წინაშე წარდგება მამაკაცის სამოსის საერთაშორისო ბრენდი 1377.

დიზაინერმა ანი დათუკიშვილმა მარანგონის ინსტიტუტის დამთავრების შემდეგ აქტიურად დაიწყო კოლექციების შექმნა და თბილისის მოდის კვირეულის ფარგელბში უკვე მე-4 კოლექციას წარმოადგენს. ბოლო ორი სეზონია შავ-თეთრი ფერები მოსწონს და კლასიკურ სტილს ანიჭებს უპირატესობას. მის მიერ შექმნილი სამოსი ქალურ ფორმებსა და დეტალებზეა აქცენტირებული.

ლაშა ჯოხაძის კოლექციებს ყოველთვის ეტყობა დიზაინერის ხელწერა. საღამოს თუ გამოსასვლელი კაბები, კლასიკური სტილი, ქუსლიანი ფეხსაცმელი და ხელით შექმნილი დეტალები ყოელთვის თან სდევს მის კოლექციებს. როგორც დიზაინერი ამბობს, ამ სეზონზე განსხვავებულ და საინტერესო ექსპერიმენტს შემოგვთავაზებს.

ქეთი ჩხიკვაძე უკვე დიდი ხანია ერთ-ერთი წარმატებული ქართველი დიზაინერის სახელს ატარებს და მისი ბრენდი არამხოლოდ საქართველოში, არამედ მის ფარგლებს გარეთაც საკმაო პოპულარობით სარგებლობს. კოლექციისთვის დამახასიათებელი ნაქარგებით და დეტალებით გაფორმებული სამოსი ყველა სეზონზე საინტერესოდ არის წარმოდგენილი. 

ბრენდი ETHÉRÉ ჯერ აქსესუარებით, ახლა კი საინტერესო სამოსითაც არის ცნობილი. ბრენდის დიზაინერი და შემქმნელი გვანცა თუთბერიძეა. სამხატვრო აკადემიაში მოდელირების ფაკულტეტის დასრულების შემდეგ დიზაინერობაზე მუდამ ოცნებობდა, მოღვაწეობა ჯერ ხელნაკეთი აქსესუარებით დაიწყო, ახლა კი ტანსაცმლის კაფსულა კოლექციას წარადგენს თბილისის მოდის კვირეულზე.

SAYYA უკრაინელი დიზაინერის ლუბა მაკარენკოს ბრენდია, რომელიც უკვე მე-3 სეზონია თბილისის მოდის კვირეულში იღებს მონაწილეობას. კოლექციები ყოველთვის ფერადი, მხიარული და ტენდენციურია. დიზაინერი ყოველთვის განსაკუთრებულ ყურადღებას უთმობს ფერთა შეხამებას და საინტერესო პრინტებს.

იქიდან გამომდინარე, რომ საქართველოში მოდის მიმართულებით არ არსებობს სერიოზული განათლების მიღების შესაძლებლობა, თბილისის მოდის კვირეული ძალიან დიდ ყურადღებას უთმობს საგანმანათლებლო სემინარებს და მსოფლიოში წამყვანი მოდის ინსტიტუტ Istituto Marangon-თან ერთად საინტერესო სემინარებს სთავაზობს ქართულ აუდიტორიას.

ამ სეზონზე TALKS 21 აპრილს SOLO-ს ჭავჭავაძის ფილიალში ჩატარდება. სპიკერებად მარანგონის დირექტორი გიუზი ლარა, მარანგონის  ბიზნეს კურსის ხემძღვანელი სენაიტ გებრიბი და ბრიტანული ბრენდ "Burberry"-ს ყოფილი ვიცე-პრეზიდენტი და Digital Department-ის ხელმძღვანელი ქრეიგ კროურფორდი საინტერესო თემებით წარსდგებიან. ვფიქრობ, ნებისმიერი ადამიანისთვის, რომელსაც მოდის ინდუსტრია აინტერესებს, საუკეთესო შესაძლებლობაა პროფესიონალი ადამიანების გამოცდილება და რჩევა გაიზიარონ.

როგორ ჩაივლის მოდის კვირეული, როგორ კოლექციებს წარმოადგენენ დიზაინერები და ყველა დანარჩენ სიახლეს, მომდევნო პოსტებში მოგიყვებით დეტალურად.

მანამდე კი იხილეთ თბილისის მოდის კვირეულის განრიგი